Sikur të mos mjaftonin problemet për Kukësin në Austri, një tjetër u shtua në momentet e fundit, kur skuadra po bëhej gati për t’u nisur drejt Moldavisë. Mbrojtësi Rexhep Memini, të cilin klubi e kishte regjistruar për ndeshjen e parë të Ligës së Kampioneve kundër Sherif Tiraspolit, nuk mundi të udhëtonte dje me ekipin.
Arsyeja duket qesharake, por është e vërtetë. “Panorama Sport” mëson se lojtarit durrsak të Kukësit kishte humbur pasaportën dhe nuk u lejua nga autoritetet austriake për të udhëtuar drejt Moldavisë. Një problem më shumë për drejtuesit, pasi njëri prej tyre ishte i detyruar të qëndronte me lojtarin dje në Austri, për ta shoqëruar tek Ambasada Shqiptare, në mënyrë që të siguronte lejen e kalimit dhe të kthehej në Tiranë.
Ndërkohë, tersi shoqëroi dje klubin edhe përpara nisjes në Moldavi. Skuadra ishte sistemuar në një nga hotelet pranë aeroportit të Vjenës, nga i cili ishte parashikuar të udhëtonte dje rreth orës 10:40 drejt Moldavisë. Por, megjithatë, udhëtimi u shty për në 12:45, ndërkohë që rreth orës 15:00 ekipi mbërriti në Kishiniev.
